Ndryshimi i ngjyrës së urinës mund të jetë shenjë paralajmëruese e kancerit të veshkës

Për zbulimin e kancerit të veshkës, i cili nuk shfaq simptoma në fazën e hershme, nevojitet kontroll i rregullt. Trajtimi zbatohet në mënyrë të individualizuar, me metoda të përshtatura sipas rastit. Duke theksuar se faktorë si pirja e duhanit, obeziteti, jeta sedentare, konsumi i tepërt i mishit dhe i produkteve të qumështit e rrisin rrezikun e kancerit të veshkës, specialistët e Urologjisë së Hisar Hospital Intercontinental dhanë informacion për kancerin e veshkës gjatë Javës së Kancerit, 1–7 Prill.

Çdo vit mijëra persona diagnostikohen me kancer të veshkës

Çdo vit një nga çdo 10 mijë personave diagnostikohet me kancer të veshkës. Meqenëse kanceri i veshkës ecën në mënyrë të fshehtë, kur vendoset diagnoza, te 25% e pacientëve sëmundja është përparuar dhe është përhapur. 90% e kancereve të veshkës janë të tipit “kancer renal qelizor”. Sëmundja, që mund të shfaqet 2–3 herë më shpesh te meshkujt, buron nga indi i veshkës që siguron formimin e urinës. Te ata me sëmundje me kalim gjenetik shfaqet në moshë më të re. Sëmundja shfaqet më shpesh në moshën 50–70 vjeç; pas moshës 45 vjeç, kontrollet e rregullta kanë rëndësi jetike.

Sëmundja mund të përparojë në mënyrë të fshehtë pa shfaqur simptoma

Me përhapjen e gjerë të ultrasonografisë, gjatë një ekzaminimi ultrasonografik të bërë për ndonjë arsye, rastësisht, kur nuk ka asnjë ankesë, lehtësisht mund të dyshohet për kancer të veshkës dhe në këtë mënyrë sëmundja mund të zbulohet herët. E rëndësishme është që kanceri i veshkës të mund të zbulohet herët pa asnjë ankesë të pacientit. Sepse nëse zbulohet në fazën e hershme, shansi për t'u shëruar plotësisht nga kanceri është shumë i lartë.

Jini në dijeni për simptomat!

Simptomat mund të shfaqen në varësi të fazës së kancerit. Gjakderdhja ose ndryshimi i ngjyrës së urinës, të dukshme me sy të lirë ose të zbuluara me analiza, masa dhe dhimbja e prekshme në zonën e veshkës, dobësi e përgjithshme, ndjenjë lodhjeje, humbje oreksi, humbje peshe, temperaturë e lartë e përsëritur, anemi, tension i lartë, mosfunksionim i mëlçisë, palpitacione, fryrje e këmbëve, si dhe dhimbje, kollë, vështirësi frymëmarrjeje, pështymë me gjak, dhimbje kockore, dhimbje koke, humbje e vetëdijes dhe paralizë, sipas organit ku ka përhapje kanceri, mund të shfaqen.

Me metodat e diagnostikimit të kryera rregullisht, kanceri mund të zbulohet në fazën e hershme

Një herë në vit ultrasonografia e veshkës dhe analiza e plotë e urinës është metoda më e rëndësishme që rekomandohet për diagnozën e hershme të kancerit të veshkës. Sidomos, personat me faktorë rreziku për zhvillimin e kancerit duhet patjetër të shkojnë te një urolog specialist në onkologji urologjike.

Metoda e trajtimit përcaktohet sipas gjendjes së pacientit

Te kanceret e veshkës, metoda më efektive e trajtimit është operacioni. Lloji i operacionit përcaktohet sipas gjendjes mjekësore të pacientit, vendosjes së kancerit, fazës, madhësisë dhe numrit të tyre, dhe kryhet ose me operacion radikal, me heqjen e plotë të veshkës, gjëndrës mbi veshkë dhe mbështjellësve dhe shtresave të yndyrës përreth, ose në mënyrë të pjesshme, duke hequr vetëm indin e sëmurë me kancer dhe duke ruajtur pjesën e mbetur të veshkës. Qëllimi duhet të jetë që, duke hequr vetëm indin kanceroz, të ruhet edhe indi normal i veshkës. Sepse kur hiqet e gjithë veshka, veshka tjetër e mbetur do të duhet të mbajë vetëm ngarkesën e trupit dhe me kalimin e kohës rritet rreziku i zhvillimit të insuficiencës kronike renale dhe sëmundjeve kardiovaskulare. Përmbledhtas, përcaktimi i llojit të operacionit është vendim që merret si rezultat i një vlerësimi të detajuar specifik për çdo pacient.

Shkalla e përhapjes së tumorit dhe faza përcaktojnë metodën e operacionit

Kur përcaktohet metoda e operacionit, faza e sëmundjes është kriter i rëndësishëm. Sot, edhe pse përdoren shpesh metodat laparoskopike ose ato me ndihmën e robotit, te sëmundja në fazë të avancuar preferohet ende kirurgjia e hapur. Në zgjedhjen e këtyre metodave luajnë rol faktorët që lidhen me kancerin dhe me pacientin. Për të konfirmuar diagnozën, mostrat e hequra ekzaminohen me metoda patologjike dhe përcaktohen lloji, karakteri dhe shkalla e përhapjes së tumorit. Në varësi të rezultatit, te disa pacientë mund të nevojitet trajtim shtesë pas kirurgjisë. Për shkak të rrezikut të lartë të përsëritjes, këta pacientë duhet ndjekur nga afër. 80% e kancereve të veshkës janë të tipit qelizor të qartë dhe janë rezistentë ndaj kemoterapisë dhe radioterapisë, si rrjedhim nuk i përgjigjen trajtimit.

Ilaçet duhet patjetër të merren dhe të përdoren nën kontrollin e specialistit.

Pas kirurgjisë, kur shihet e nevojshme, ose në rast sëmundjeje të avancuar, përveç kirurgjisë përdoren edhe trajtime biologjike. Për momentin, trajtimi biologjik më efektiv për kancerin e veshkës janë “trajtimet e synuara”. Përdoren ilaçe që pengojnë formimin ose shfaqjen e efekteve të mikromolekulave që kanë rol në vaskularizimin dhe shumëzimin e indit kanceroz. Faktorët që lidhen me pacientin dhe lloji patologjik i kancerit janë të rëndësishëm në zgjedhjen e ilaçit. Për shkak të efekteve anësore, duhet të aplikohet në qendra me përvojë.

Kontroll i rregullt kundër rrezikut të përsëritjes është i domosdoshëm!

Është shumë e rëndësishme që pacientët me kancer të veshkës të kontrollohen shpesh dhe rregullisht pas trajtimit. Përcaktimi veç e veç i shpeshtësisë dhe përmbajtjes së kontrolleve për çdo pacient është rruga më e arsyeshme. Edhe kur indi kanceroz është hequr plotësisht me trajtim kirurgjik, ekziston rreziku 20–30% i përsëritjes së kancerit. Për momentin nuk ka masë që ta zvogëlojë këtë mundësi. Prandaj, nëse te sëmundja shfaqet përsëritje, është jetike që ajo të vërehet menjëherë dhe të trajtohet, prandaj vazhdimi i kontrolleve të rregullta ka rëndësi jetike.

Ushqimi juaj të mos ju çojë në kancer të veshkës

Si në çdo sëmundje kancerore, edhe te kanceri i veshkës, mënyra e ushqimit ka rëndësi. Një nga shkaktarët kryesorë të kancerit është pirja e duhanit. Zakoni i pirjes së duhanit është faktori më i rëndësishëm në formimin e kancerit të veshkës. Largimi nga duhani, që përmban shumë substanca kimike dhe lëndë që mund të shkaktojnë kancer, dhe lënia e tij sa më shpejt nëse përdoret, duhet të jetë në krye të masave kundër kancerit. Te mënyra e ushqimit, ushqyerja afatgjatë me dietë yndyrore me shumë kalori ose bërja e dietave, konsumi i tepërt i ushqimeve me proteina të larta si mishi dhe produktet e qumështit mund të shkaktojnë kancer. Gjithashtu, ekspozimi afatgjatë ndaj rrezatimit, hemodializës dhe substancave kimike është ndër shkaqet që rrisin faktorin e rrezikut për kancer të veshkës. Te personat me histori familjare kanceri, rreziku i të sëmuarit me kancer është 2 herë më i lartë. Për këtë arsye, është e domosdoshme që ata të bëjnë vizita të rregullta.