Çfarë është PET-CT?
PET-CT, një metodë e avancuar imazherike e përftuar duke bashkuar dy pajisje të ndryshme në një pajisje të vetme, luan rol aktiv sidomos në onkologji, përveç sëmundjeve të zemrës dhe neurologjike. Duke skanuar të gjithë trupin nga koka deri në këmbë me rrezatim të ulët dhe shpejtësi të lartë, ai përdoret në diagnostikimin e sëmundjeve kanceroze, planifikimin e trajtimit dhe vlerësimin pas trajtimit.
PET-CT është një metodë e avancuar imazherike e krijuar nga kombinimi i tomografisë me emision pozitronik (PET) dhe tomografisë së llogaritur (CT).
Pajisja PET-CT;
Kanceri
Sëmundje që nuk mund të diagnostikohen
Infeksionet
Sëmundjet e zemrës
Çrregullimet e trurit
Dallimi i Alzheimerit dhe i demencës
në raste të tilla shërben si udhërrëfyes në diagnostikimin e hershëm dhe planifikimin e trajtimit.
PET-CT në onkologji
Në sëmundjet onkologjike, PET-CT përdoret në diagnostikimin e hershëm të kancerit, planifikimin e trajtimit, përcaktimin e stadit, zbulimin e recidivave, identifikimin e metastazave, planifikimin e radioterapisë dhe vlerësimin e suksesit të trajtimit.
PET-CT ka efektin më të madh në llojet e mëposhtme të kancerit:
Kanceri i mushkërive
Kanceri i gjirit
Kanceri i tiroides
Kanceret e kokës dhe qafës
Kanceret kolorektale
Kanceri i ezofagut (i qemshit)
Kanceri i stomakut
Kanceret ginekologjike
Kanceri i fshikëzës
Kanceri i prostatës
Limfoma
Melanoma
PET-CT në sëmundjet e zemrës
PET-CT luan rol në përcaktimin e zonave me rrjedhje të ulët gjaku, të shkaktuara nga bllokimet e arterieve koronare. Identifikimi i këtyre zonave është i rëndësishëm për të përcaktuar nëse angioplastika ose kirurgjia e by-pass-it koronar do të sjellë dobi.
PET-CT në sëmundjet e trurit
Zbulimi i tumoreve të trurit, konvulsioneve, Alzheimerit dhe sëmundjeve të demencës mund të bëhet duke përdorur teknologjinë PET-CT.
Cilat janë avantazhet e PET-CT?
Zakonisht, mjekët interpretojnë sëmundjet duke vendosur mbi njëri-tjetrin rezultatet e skanimeve PET dhe CT të kryera veçmas. Megjithatë, për këtë duhet që pacienti të vendoset në pozicionin e saktë të njëjtë në të dy skanimet. Meqë kjo nuk është gjithmonë e lehtë për t'u realizuar, saktësia e informacionit diagnostik mund të dëmtohet.
Pajisja PET-CT, nga ana tjetër, u lejon mjekëve të kryejnë të dy skanimet shpejt, në një seancë të vetme, pa qenë nevoja të lëvizin pacientin. Kështu, të dhënat metabolike nga skanimi PET dhe të dhënat anatomike nga CT, të marra njëkohësisht nga një pajisje e vetme, japin informacion më të detajuar dhe më të saktë në krahasim me metodat e tjera imazherike.
Përfitimet për pacientët tanë
Rezolucion i lartë
Pajisja PET-CT e spitalit tonë u shërben pacientëve me imazhe me rezolucionin më të lartë në sektor, me matricë rekonstruksioni 400x400 dhe 95 mm3. Kështu, zbulohen edhe detajet më të vogla që nuk mund të shihen me pajisje të tjera, duke kontribuar në procesin e diagnostikimit dhe trajtimit dhe duke ndihmuar në parandalimin e operacioneve dhe biopsive të panevojshme.
Gantri më i gjerë
Pajisja jonë, e zhvilluar duke pasur parasysh pacientët me mbipeshë dhe obezitet, ka gantri 24 për qind më të gjerë se ato të prodhuesve të tjerë. Hapësira më e gjerë është gjithashtu një avantazh për personat me klaustrofobi.
Rrezatim i ulët, shpejtësi e lartë
Pajisja jonë PET-CT, që punon me dozë më të ulët rrezatimi, nga njëra anë rrit rehatinë e pacientit, ndërsa nga ana tjetër, me shpejtësi maksimale skanon me përpikmëri të gjithë trupin dhe zbulon vendndodhjen e anomalive, si qelizat kanceroze.
Diagnostikim me më pak substancë radioaktive
Krahasuar me pajisjet e tjera, skanimet mund të kryhen duke marrë imazhe me rezolucion të lartë me një dozë më të ulët të substancës radioaktive të dhënë nëpërmjet venës.
Si funksionon PET-CT?
Rruga e ndjekur gjatë skanimit, hap pas hapi, është si më poshtë:
Para skanimit PET-CT kërkohet agjërim 6 orë.
Matet niveli i glukozës së pacientit. Për skanimin, niveli i glukozës në gjak duhet të jetë nën kufirin e kërkuar.
Molekula e sheqerit e shënuar me substancë radioaktive, e thithur nga qelizat, injektohet në trup nëpërmjet venës.
Pritet afërsisht 1 orë që ilaçi të grumbullohet në qeliza.
Pacienti vendoset në pajisjen PET-CT dhe fillon fotografimi.
Me ndihmën e rrezeve X merren imazhe të detajuara 3-dimensionale të trupit.
Molekulat e sheqerit të grumbulluara në strukturat anormale ose në qelizat kanceroze dallohen lehtë falë imazheve të tyre të ndritshme.
Kohëzgjatja e skanimit është 20-25 minuta, në varësi të zonës që do të fotografohet.
Procesi pas PET-CT
Rrezatimi i marrë gjatë PET-CT largohet me urinë. Për këtë arsye, veçanërisht në ditën e skanimit, rekomandohet të pini shumë ujë dhe ta shkarkoni tualetin disa herë pas urinimit.
Nga ana tjetër, rrezatimi i marrë gjatë procedurës, megjithëse nuk paraqet rrezik për personat përreth, rekomandohet që për 12 orë të shmangen kontaktet e gjata me fëmijët e vegjël dhe gratë shtatzëna, të cilët përfshihen në grupin me rrezik ndaj rrezatimit.
