Најчесто поставувани прашања

Што е нуклеарна медицина?

Тоа е област на медицината во која се користи многу мала количина на радиоактивен агенс при дијагностика и лекување на различни болести. Откако супстанциите ќе се внесат во телото, сликите на активноста задржана во соодветниот орган се собираат со помош на гама камера и се толкуваат од страна на лекарот со цел дијагностицирање. Врз основа на тоа што зрачењето ги уништува клетките, кај некои болести се можни и апликации со висока доза за терапевтски цели.

Како се изведува студијата од нуклеарна медицина?

Најчесто преку површинските вени, понекогаш преку уста или со вдишување, на пациентот му се дава многу мала количина на специфичен радиоактивен материјал за соодветниот орган. Материјалот се локализира во органот и емитува гама зрачење, кое го детектира посебна камера. Камерата го снима радиоактивниот материјал во органот и ги пренесува овие информации на компјутерски екран или на филм. Сликите на соодветниот орган се земаат веднаш по инјекцијата или, во зависност од студијата, по часови или денови. Времетраењето на собирањето слики е од 15 до 60 минути. Кај повеќето тестови пациентот само лежи на кревет, а понекогаш седи.

Како се даваат супстанциите на пациентот?

Најчесто со многу тенка игла во површинска вена на предмишницата, понекогаш преку уста или со инхалација.

Колку трае тестот од нуклеарна медицина?

Зависи од тестот. Бидејќи локализацијата на радиоактивниот материјал зависи од физиолошкото однесување на соодветниот орган и карактеристиките на материјалот, оптималното време за снимање се разликува од орган до орган. Понекогаш, како кај снимањата на срцето, истиот орган може да бара две одделни снимања во истиот ден – по физички напор и во мирување. Снимањето на белите дробови може да трае половина час, а за срцето и за целото тело скелетна сцинтиграфија – од 2 до 3 часа. Завршувањето на снимања како галиум и октреотид може да трае 24 до 48 часа.

Дали пациентот треба да се подготви посебно пред снимањето?

Некои тестови бараат минимална подготовка или воопшто не бараат подготовка (на пример, за коски, мозок, бубрези, белите дробови), додека други бараат подготовка. На пример, за жолчното кесе потребно е гладување 4 часа, а за срцевиот тест – да не се пие кафе или чај почнувајќи од 24 часа пред тестот. Затоа, пред тестот секогаш е потребно да се побараат информации.

Дали сцинтиграфските снимања имаат несакани ефекти?

Бидејќи дозите што се даваат на пациентот содржат минимален носител, тие не предизвикуваат сериозни несакани ефекти или алергиска реакција. Дозата на зрачење што се користи во тестот од нуклеарна медицина може да биде помала од онаа кај многу дијагностички радиолошки тестови, од зрачењето при патување со авион или од позадинското зрачење на Земјата. Меѓутоа, бидејќи супстанцијата преминува во мајчиното млеко, се препорачува бебето да не се доји до 24 часа по инјекцијата. За да се забрза излачувањето на супстанциите преку бубрезите и мочниот меур, особено по целосните скелетни сцинтиграфии, се препорачува да се пие многу вода, освен ако лекарот на пациентот не наложи поинаку.

Која е корисноста од тестовите на нуклеарна медицина?

Овие тестови се многу чувствителни и откриваат некои болести во многу рана фаза, на пример метастази на канцерот во коските, болеста на Алцхајмер и др. Во споредба со тестовите како магнетна резонанца и томографија, кои даваат анатомски информации, тие даваат информации за функционалната состојба и виталноста на различни органи и ткива.

Како пациентот може да закаже термин?

Откако барањето ќе биде издадено од примарниот лекар или специјалистот, пациентот или неговиот лекар може да закаже термин со повикување на нашиот Центар за повици на број 444 5 888.