Мал по себе, но голема штета: Бубрежен камен

За бубрежните камења, кои иако мали, со болката што ја предизвикуваат, зазеле големо место во нашите животи, и за она што најмногу интересира во врска со нивното лекување, специјалистите од Одделот за урологија информираа на 10 март, Светскиот ден на бубрегот.

Болеста може генетски да се наследи во семејството

Обично почнува во дваесетите години и кај мажите се јавува 2-3 пати почесто отколку кај жените. Камените болести во нашата земја се појавуваат почесто (просечно 15%) отколку во другите земји. Најистакнатите фактори што влијаат на формирањето камен се: генетската склоност, возраста, полот, географските фактори, климата и навиките во исхраната. Кај пациентите со камена болест, во нивните семејства постои историја на камена болест во стапки кои се движат од 10% до 40%.

Долги и неподносливи болки - најважен симптом

Болката во слабината на страната каде што се наоѓа каменот е најважниот симптом. Болката може да биде силна, пробадачка, како нож, но може и да трае долго и да биде поднослива. Клинички, кај пациентите вториот најчест наод е присуство на крв во урината. Може да се појават и мачнина и повраќање. Кај пациентите со камен, поради опструкцијата, често се јавуваат и инфекции. Инфекцијата може да биде многу блага, но може и да доведе до воспаление на бубрегот. Во овие случаи пациентот се жали на висока температура и силна болка во слабината.

Развиените дијагностички методи можат да го откријат и најмалиот камен

Кај пациентите со сомнение за камен, со директна абдоминална графија, ултразвук и спирална компјутеризирана томографија лесно може да се постави дијагноза со радиолошките методи. Спиралната компјутеризирана томографија е најнапредниот дијагностички метод кој може да детектира дури и камења со милиметарска големина. Ако е дијагностициран, но не се лекува, во зависност од големината на каменот, местото и тоа дали предизвикува опструкција, може да настанат неповратни оштетувања на бубрезите, мочниот меур и уринарните патишта, па дури и бубрежна инсуфициенција и инфекции. Затоа, кога каменот е мал, се дијагностицира без да предизвика какво и да е трајно оштетување, а со брз процес на лекување се постигнува ефикасен резултат и бубрезите, пред сè, и уринарните патишта остануваат зачувани.

Се применуваат методи на лекување посебно прилагодени на состојбата на пациентот

Пристапот кон лекување кај камената болест треба да биде „персонализиран третман“ според пациентот. Кај некои пациенти, со оглед на големината и местото на каменот, само со конзервативен мониторинг може каменот спонтано да се спушти, додека на други пациенти итно треба да се применат активни методи на лекување. Планот на лекување се менува во зависност од местото во уринарниот систем каде се наоѓаат камењата, нивниот број и големина. Благодарение на технолошките достигнувања и современите пристапи, денес 99% од бубрежните камења можат да се лекуваат со затворени (ендоскопски) методи. Така, пациентите не остануваат долго време во болница и можат во кратко време да се вратат на работа и секојдневните активности.

Ако сте пациент со камен…

Секој ден консумирајте најмалку 2 литри вода.

Ако имате често повторувачка камена болест, обврзно составете го вашиот режим на исхрана со помош на специјалист за исхрана и диететика, на кого ќе ве упати вашиот лекар.

Редовно одете на шетање и вежбајте.

Обидете се да водите живот далеку од стрес.

Камињата што ќе ги исфрлите чувајте ги за да ги оцени заедно со вашиот лекар при редовните контроли.

На секои 6 месеци повторете ја анализата на урината и ултразвучниот преглед.

Ако и покрај сето ова внимавате, а имате често повторувачка камена болест, направете ги потребните контроли и испитувања за да ги откриете причините што доведуваат до формирање камен.

Ако во вашето семејство има распространета камена болест, обратете се кај вашиот лекар за да поминете генетски испитувања.