Transferimi i Embrionit në Kohën e Duhur

Çfarë është transferimi i embrionit?

Hapi i fundit i metodës së tubës së fëmijëve, ku embrioni i formuar nga përbashkimi i vezës dhe spermës transferohet në mitrën e nënës, quhet transferim embrioni. Për të rritur sukseset e shtatzënisë, duhet të zgjidhen embrionet më cilësorë dhe të transferohen në kohën më të përshtatshme.

Si kryhet transferimi i embrionit?

Nga gruaja merret vezë. Më pas, vezët e vendosura në të njëjtin mjedis me qelizat e spermës pritet të fekondohen brenda rreth 2-3 ditësh dhe formohet embrioni me 2-8 qeliza. Mes këtyre embrioneve zgjidhen ata më të shëndetshëm dhe më cilësorë. Përpara transferimit, nënës së ardhshme i kërkohet të ketë qesen e urinës plot, që të merret imazh sa më i saktë me ultratinguj.

Gjatë transferimit të embrionit, i cili nuk kërkon anestezi, pacientja përgatitet si për ekzaminimin ginekologjik dhe përmes një katetri të hollë futet brenda mitrës. Embrionet e mbledhura vendosen në mitrën e nënës pa dhimbje. Pacientja mund të ngrihet në këmbë rreth gjysmë ore pas transferimit.

Për të zvogëluar rrezikun e abortit dhe për të rritur mundësinë e shtatzënisë, nënës së ardhshme mund t'i jepen disa ilaçe, supozitore dhe injeksione. Në ditën e 10-12 pas transferimit kërkohet analiza e gjakut për testin Beta-HCG dhe kryhet kontrolli i shtatzënisë.

Kur kryhet transferimi i embrionit?

Koha e transferimit është një nga faktorët më të rëndësishëm që ndikojnë në shkallën e shtatzënisë. Që embrionet të vendosen në mitrën e nënës, duhet që ata të kenë arritur pjekurinë e duhur. Duke marrë parasysh veçori si mosha e nënës së ardhshme, historia shëndetësore, numri dhe cilësia e embrioneve, vendoset koha më e përshtatshme për transferim. Ky proces kryhet zakonisht 2-5 ditë pas fekondimit.