Причини За Инфертилитет Кај Жената

Причини поврзани со јајниците

Кај жената, една од најчестите причини за неплодност се проблемите поврзани со овулацијата (25%). Кај некои жени може воопшто да нема овулација или таа да биде нередовна. Нередовните менструации се предупредување за ова, но и кога менструациите се редовни може да се јават нарушувања на овулацијата. Најчестата причина за нарушувања на овулацијата е полицистичниот овариумски синдром (ПЦОС). Овие пациентки обично се со вишок телесна тежина, имаат машки тип на влакнестост, нередовни менструации и се неплодни. Прекумерното лачење на хормонот пролактин (млечниот хормон) од мозочното стебло, како и недостатокот на лачење на хормоните што ја стимулираат работата на јајниците, може исто така да доведе до проблеми со овулацијата. Цистите на јајниците, инфекциите, чоколадната циста (ендометриома), канцерите и претходно изведените операции исто така можат да ги нарушат функциите на јајниците и да предизвикаат инфертилитет. Зрачната и лековита терапија што се користи за лекување на рак може да предизвика оштетување на јајните клетки.

Причини поврзани со јајцеводите

Јајцеводите (тубите) се тенки канали што се наоѓаат меѓу матката и јајниците. Сперматозоидот поминува низ матката, доаѓа до јајцеводите и ја оплодува јајната клетка ослободена од јајникот. Делумното или целосното затнување на јајцеводите, или нарушената функција на јајцеводите, ја спречува средбата на сперматозоидот и јајната клетка и предизвикува неплодност (35%). Претходно прележани инфекции што се пренесуваат при полов однос, туберкулоза (ТБЦ), ендометриоза или сраснувања по абдоминални операции можат да им наштетат на јајцеводите. Вроден неразвој на јајцеводите е исто така една од ретките причини за неплодност.

Причини поврзани со матката

Јајната клетка, откако ќе се оплodi во јајцеводот, неколку дена подоцна се вгнездува во матката и својот развој го продолжува во матката до породувањето. Вродена преграда во матката, формации како миом/полип и слично, претходни абortusi и операции или инфекции, како и сраснувањата поврзани со нив, можат да го спречат вгнездувањето и развојот на ембрионот (оплодената јајна клетка) во матката и да предизвикаат неплодност.

Причини поврзани со грлото на матката

Слузта што се лачи од грлото на матката и се зголемува во периодите на овулација ги олеснува преминувањето на сперматозоидите во матката. Нарушувањата на слузта на грлото на матката, структурните нарушувања, полипите и слични тумори, претходно изведените хируршки интервенции можат да предизвикаат инфертилитет. Од грлото на матката можат да се лачат антитела што ги нарушуваат или ги убиваат движењата на сперматозоидите. Меѓутоа, денес се смета дека истражувањата и третманите со антитела не се корисни. Овој проблем се надминува со методи како инсеминација и микроинјекција.