ქალთა უნაყოფობის დიაგნოსტიკური მეთოდები

ჰორმონული ტესტები

მენსტრუაციის მე-2 ან მე-3 დღეს ინიშნება FSH, LH, E2, PRL, TSH. საჭიროების შემთხვევაში საკვერცხეების რეზერვის დასადგენად შეიძლება დამატებითი ტესტებიც ინიშნოს — ინჰიბინი და AMH.

ულტრასონოგრაფია (USG)

საკვერცხეების რეზერვის დასადგენად, საშვილოსნოსა და მილების შესაფასებლად მენსტრუაციის მე-2 ან მე-3 დღეს ტარდება ულტრასონოგრაფიული გამოკვლევა.

სალინური ინფუზიური სონოგრაფია (SİS)

პროცედურა, რომელიც ტარდება საშვილოსნოს ღრუში მოცულობის მქონე წარმონაქმნების (პოლიპი, მიომა, ძგიდე და სხვ.) და შეხორცებების გამოსავლენად. საშვილოსნოს ყელიდან თხელი კათეტერის საშუალებით შეჰყავთ ფიზიოლოგიური ხსნარი და ულტრასონოგრაფიით ხდება შეფასება.

საშვილოსნოს რენტგენოგრაფია (HSG)

საშვილოსნოს ყელიდან საკონტრასტო ნივთიერების შეყვანით, საშვილოსნოსა და მილების გამოსახვით იღება სერიული რენტგენოგრამები. შესაძლებელია დადგინდეს საშვილოსნოს ყელის უკმარისობა, საშვილოსნოს ღრუში მოცულობითი წარმონაქმნები, შეხორცებები, თანდაყოლილი სტრუქტურული დარღვევები, მილების გამტარიანობა და სითხის დაგროვება, თუ ის არსებობს.

ჰისტეროსკოპია

პროცედურა, რომლის დროსაც საშვილოსნოს ღრუ ითვალიერება განათებადი აპარატის საშუალებით, რაც იძლევა საშვილოსნოში არსებული პრობლემების დიაგნოსტიკისა და მკურნალობის იმავე სეანსზე ჩატარების შესაძლებლობას.

ლაპაროსკოპია

პროცედურა, რომლის დროსაც ზოგადი ანესთეზიის ქვეშ ჭიპის მიდამოში მცირე ჭრილობით შეყვანილი განათებადი აპარატის საშუალებით იკვლევენ მუცლის ღრუს ორგანოებს. იძლევა იმავე სეანსზე დიაგნოსტიკისა და მკურნალობის საშუალებას. გამოიყენება დიაგნოსტიკური და სამკურნალო მიზნებით იმ შემთხვევებში, როდესაც სხვა დიაგნოსტიკური მეთოდებით ზუსტი ინფორმაციის მიღება შეუძლებელია: მუცლის ღრუში შეხორცებებისას, ენდომეტრიოზისას (საშვილოსნოს შიდა ფენის მსგავსი უჯრედული ქსოვილის არსებობა საშვილოსნოს გარეთ), მილების ანთებითი მდგომარეობისას, საკვერცხის კისტებისას, ექტოპიური ორსულობისას, მიზეზმიუკვლეველი ტკივილისა და უნაყოფობის შემთხვევებში.