გინეკოლოგიური ონკოლოგია

გინეკოლოგიური ონკოლოგია მედიცინის სპეციალიზებული დარგია, რომელიც ყურადღებას ამახვილებს ქალის რეპროდუქციულ ორგანოებთან დაკავშირებულ ყველა სახის კიბოზე, მათ შორის საშვილოსნოს კიბოზე, საშვილოსნოს ყელის კიბოზე, საკვერცხის კიბოზე, საშოს კიბოსა და ვულვის კიბოზე, ასევე მათ მკურნალობაზე. კიბოს დიაგნოზის დასმის შემთხვევაში მკურნალობის მრავალი ვარიანტი არსებობს. არსებობს მკურნალობის ეფექტური მეთოდები, როგორიცაა ქირურგია, ქიმიოთერაპია და სხივური თერაპია.

რა არის გინეკოლოგიური ონკოლოგია?

გინეკოლოგიური ონკოლოგია ქალის რეპროდუქციული სისტემის კიბოს დიაგნოსტიკითა და მკურნალობით არის დაკავებული. ყველა ქალი იმყოფება გინეკოლოგიური კიბოს რისკის ქვეშ და ასაკთან ერთად ეს რისკი იზრდება. ამიტომ გინეკოლოგიური ონკოლოგია, რომელიც ქალის რეპროდუქციულ სისტემაზე მოქმედი დაავადებების პრევენციაზე, დიაგნოსტიკასა და მკურნალობაზეა ორიენტირებული, უაღრესად მნიშვნელოვანია. ეფექტური მკურნალობისთვის კი დაავადებების ადრეულ დიაგნოსტიკას დიდი მნიშვნელობა აქვს.

სპეციალურად მომზადებულ ექიმებს, რომლებიც ქალის სასქესო ორგანოებში განვითარებული კიბოს სახეობებისა და მათი წინამორბედი დაზიანებების დიაგნოსტიკას, მკურნალობასა და მონიტორინგს ახორციელებენ, ონკოგინეკოლოგები ეწოდებათ. ონკოგინეკოლოგთან რეგულარული ვიზიტი მნიშვნელოვანია ადრეული დიაგნოსტიკისთვის, რაც ჯანმრთელობის სერიოზული გართულებების რისკის შემცირების საუკეთესო გზაა.

რა სიმპტომები აქვს გინეკოლოგიურ კიბოს?

გინეკოლოგიური კიბოს ხუთი ძირითადი სახეობიდან – საშვილოსნოს ყელის კიბო, საკვერცხის კიბო, საშვილოსნოს კიბო, ვულვის კიბო და საშოს კიბო – სკრინინგული ტესტებით მხოლოდ საშვილოსნოს ყელის კიბოს გამოვლენაა შესაძლებელი. კიბოს სხვა სახეობების დიაგნოსტიკისთვის საჭიროა, ამოიცნოთ სიმპტომები და აცნობოთ ისინი ექიმ-სპეციალისტებს. თითოეულ გინეკოლოგიურ კიბოსთან დაკავშირებული სიმპტომები შეიძლება განსხვავდებოდეს. თუმცა, ზოგიერთი გავრცელებული სიმპტომი, რომელიც უნდა იცოდეთ, შემდეგია:

• საშოდან არანორმალური გამონადენი ან სისხლდენა

• წონის უეცარი კლება

• ხშირი შარდვა

• ფეხების შეშუპება

• მადის დაკარგვა და მუდმივი სისავსის შეგრძნება

• ტკივილი მენჯის ან მუცლის არეში

• მუდმივი დაღლილობა

• მუცლის შებერილობა

• ხანგრძლივი გულისრევა

• ვულვის (ქალის სასქესო ორგანოს გარეთა ნაწილის) წვა ან ქავილი

ამ სიმპტომების ქონა არ ნიშნავს, რომ კიბო გაქვთ. თუმცა, თუ ისინი ორ კვირაზე მეტხანს გაგრძელდა, შეგიძლიათ რაც შეიძლება მალე ჩაეწეროთ გინეკოლოგთან თქვენი მდგომარეობის შესაფასებლად.

რა იწვევს გინეკოლოგიურ კიბოს?

კიბოს თითოეულ სახეობას საკუთარი რისკფაქტორები და მიზეზები აქვს. კიბოს გამომწვევი ამ ფაქტორებიდან ზოგი თქვენს კონტროლს ექვემდებარება, ზოგი კი – არა.

გინეკოლოგიური კიბოს მიზეზები, რომელთა მართვაც შეგიძლიათ:

• ჯანმრთელობის პრობლემები, როგორიცაა დიაბეტი და ჰიპერტენზია

• აივ-ინფექცია ან შიდსი

• სიმსუქნე

• თამბაქოს მოწევა

• HPV ინფექცია

• რეგულარულ გინეკოლოგიურ გასინჯვაზე არმისვლა

გინეკოლოგიური კიბოს მიზეზები, რომელთა შეცვლაც არ შეგიძლიათ:

• ასაკი

• პოლიკისტოზური საკვერცხის სინდრომი

• უშვილობა

• ოჯახში კიბოს ანამნეზი

• მუცლადყოფნისას დიეთილსტილბესტროლის ზემოქმედება

• მენსტრუაციასთან დაკავშირებული ფაქტორები, როგორიცაა მენსტრუაციის დაწყება 12 წლამდე ან მენოპაუზის დადგომა 50 წლის შემდეგ

რა არის გინეკოლოგიური კიბოს რისკფაქტორები?

ფაქტორებს, რომლებიც რაიმე დაავადების განვითარების ალბათობას ზრდის, რისკფაქტორები ეწოდება. თითოეულ კიბოს განსხვავებული რისკფაქტორები აქვს. მაგალითად, მოწევა კიბოს უმეტესი სახეობის რისკფაქტორია. თუმცა, ამ ფაქტორების არსებობა არ ნიშნავს, რომ დაავადება აუცილებლად განგივითარდებათ.

საშვილოსნოს ყელის კიბოს რისკფაქტორები

ცნობილია, რომ საშვილოსნოს ყელის კიბოს რისკზე ადამიანის პაპილომავირუსი (HPV) მოქმედებს. სქესობრივი გზით გადამდები HPV გავრცელებული ინფექციაა. მაღალი რისკის HPV-ით დიაგნოსტირებულ პაციენტებში მოწევამ და კონტრაცეპტიული აბების ხანგრძლივმა მიღებამ შეიძლება საშვილოსნოს ყელის კიბოს რისკი გაზარდოს.

საშვილოსნოს ყელის კიბო შეიძლება ასევე განვითარდეს დიეთილსტილბესტროლის (DES) ზემოქმედების შედეგად. ეს პრეპარატი ესტროგენის სინთეზური ფორმაა, რომელიც 1940-1971 წლებში ორსულებს ენიშნებოდათ. თუ მუცლადყოფნისას ამ პრეპარატის ზემოქმედების ქვეშ მოხვდით, შეგიძლიათ საშვილოსნოს ყელის კიბოს რისკის შესახებ ექიმს გაესაუბროთ.

საკვერცხის კიბოს რისკფაქტორები

ბევრ ქალს შეიძლება საკვერცხის კიბო განუვითარდეს მაღალი რისკის გარეშეც. თუმცა, შემდეგმა მდგომარეობებმა შეიძლება საკვერცხის კიბოს რისკი გაზარდოს:

• გენეტიკური მიდრეკილება

• ოჯახში ძუძუს ან საკვერცხის კიბოს ანამნეზი

• ასაკის მატება

• სიმსუქნე

• ორსულობის ანამნეზის არქონა

• მენოპაუზის შემდგომი ჰორმონჩანაცვლებითი თერაპია

საშვილოსნოს კიბოს რისკფაქტორები

შემდეგმა ფაქტორებმა შეიძლება საშვილოსნოს კიბოს განვითარების რისკი გაზარდოს:

• ასაკი: საშვილოსნოს კიბო ხშირად 50 წლის შემდეგ ვლინდება.

• გენეტიკა: პაციენტებში, რომელთა ოჯახშიც მსხვილი ნაწლავის კიბოს ან სხვა კიბოს შემთხვევები ყოფილა, საშვილოსნოს კიბოს რისკი მაღალია.

• მე-2 ტიპის დიაბეტი: მე-2 ტიპის დიაბეტით დაავადებულ პაციენტებში, რაც ხშირად ჭარბ წონასთან არის დაკავშირებული, საშვილოსნოს კიბოს რისკი შეიძლება გაიზარდოს.

• სხვა სახის კიბო: ადამიანებს, რომლებსაც გადატანილი აქვთ მსხვილი ნაწლავის კიბო, ძუძუს კიბო ან საკვერცხის კიბო, საშვილოსნოს კიბოს განვითარების მაღალი რისკი აქვთ.

• სხივური თერაპია: მენჯის არეში სხვა კიბოს გამო ადრე ჩატარებული სხივური თერაპია საშვილოსნოს კიბოს რისკს ზრდის.

საშოს კიბოს რისკფაქტორები

საშოს კიბოს ყველაზე ხშირად HPV ვირუსი იწვევს. საშოს კიბოს სხვა რისკფაქტორებია:

• 60 წელზე მეტი ასაკი

• საშვილოსნოს კიბოს ან საშვილოსნოს ყელის კიბოს ანამნეზი

• მოწევა

• მუცლადყოფნისას DES-ის ზემოქმედება

ვულვის კიბოს რისკფაქტორები

როგორც კიბოს რიგ სხვა სახეობებში, ვულვის კიბოს გამომწვევი მნიშვნელოვანი რისკფაქტორი HPV ვირუსია. HPV-ის მქონე ადამიანებში მოწევა კიბოს რისკს კიდევ უფრო ზრდის.

ვულვის კიბოს გამომწვევი კიდევ ერთი ფაქტორია სკლეროზული ლიქენი. სკლეროზული ლიქენი იშვიათი აუტოიმუნური დაავადებაა, რომელიც ვულვის გათხელებას იწვევს. მისი ყველაზე ხშირი სიმპტომი ქავილია.

რა სიმპტომები აქვს საშვილოსნოს კიბოს ახალგაზრდა ასაკში?

საშვილოსნოს კიბო ძირითადად მენოპაუზის შემდგომ პერიოდში გვხვდება და პაციენტების უმეტესობა 50-60 წლისაა. თუმცა, იშვიათად, საშვილოსნოს კიბო ახალგაზრდა პაციენტებშიც შეიძლება შეგვხვდეს. ახალგაზრდა ქალებში საშვილოსნოს კიბოს განვითარებასა და სიმსუქნეს შორის ძლიერი კავშირი არსებობს.

ახალგაზრდა ასაკში საშვილოსნოს კიბოს ერთ-ერთი მთავარი სიმპტომი საშვილოსნოს არანორმალური სისხლდენაა. თუ მენსტრუაციებს შორის სისხლდენა გაქვთ, მენსტრუაცია ჩვეულებრივზე დიდხანს გრძელდება ან ჭარბი სისხლდენა აღინიშნება, ეს არანორმალურ მდგომარეობად ითვლება.

მენჯის არეში ტკივილი კიდევ ერთი სიმპტომია, რომელიც ახალგაზრდა ასაკში საშვილოსნოს კიბოთი დაავადებულ პაციენტებში ვლინდება.

სქესობრივი კავშირის შემდეგ ტკივილი, შარდვის დარღვევები და საშოდან არანორმალური გამონადენი ასევე ის სიმპტომებია, რომლებიც შეიძლება აღინიშნოს ახალგაზრდა ასაკში საშვილოსნოს კიბოთი დაავადებულ ადამიანებში.

თუ ახალგაზრდა ასაკში საშვილოსნოს კიბოს ერთი ან რამდენიმე სიმპტომი შენიშნეთ, ნუ უგულებელყოფთ და რაც შეიძლება მალე მიმართეთ სპეციალისტს.

როგორ ხდება დიაგნოსტიკა და მკურნალობა გინეკოლოგიურ ონკოლოგიაში?

პაციენტის ოჯახური ანამნეზის, სამედიცინო ისტორიისა და გამოვლენილი სიმპტომების მიხედვით გინეკოლოგიური კიბოს დიაგნოზი სხვადასხვა გზით შეიძლება დაისვას. გინეკოლოგიური კიბოთი დაავადებულ პაციენტებში მკურნალობის გეგმა შეიძლება განსხვავდებოდეს მრავალი ფაქტორის მიხედვით, როგორიცაა კიბოს სახეობა, მისი გავრცელების ხარისხი და არის თუ არა პაციენტი რეპროდუქციულ ასაკში.

დიაგნოსტიკა გინეკოლოგიურ ონკოლოგიაში

გინეკოლოგიურ ონკოლოგიაში დიაგნოზი სხვადასხვა დიაგნოსტიკური ტესტით ისმება. ფიზიკური გასინჯვის შემდეგ ექიმი განსაზღვრავს, რომელი დიაგნოსტიკური ტესტებია საჭირო. დიაგნოსტიკური ტესტებია:

• სისხლის ანალიზები: კიბოს არსებობის დასადგენად არსებობს სპეციალური სისხლის ანალიზები, რომლებიც სიმსივნურ მარკერებსა და სისხლის სხვა კომპონენტებს აჩვენებს. ანალიზის შედეგების საფუძველზე ექიმს შეუძლია დიაგნოსტიკის შემდეგი ეტაპების დაგეგმვა.

• პაპ-ნაცხის ტესტი: ეს ტესტები, როგორც წესი, რუტინული გინეკოლოგიური გასინჯვისას ტარდება. კიბოს რაიმე ნიშნის არარსებობის შემთხვევაშიც კი საშვილოსნოს ყელის ზედაპირიდან უჯრედები აიღება და გამოსაკვლევად იგზავნება. ეს ტესტი უჯრედული ცვლილებების კიბოდ გადაქცევამდე გამოვლენის ეფექტური საშუალებაა.

• ვიზუალიზაციის კვლევები: ეს არის კვლევები, რომლებიც მენჯისა და მუცლის ღრუს ქსოვილების გამოსახულებას ქმნის ნებისმიერი სიმსივნის ვიზუალიზაციისთვის. ულტრაბგერითი კვლევა, მაგნიტურ-რეზონანსული ტომოგრაფია (MRI), რენტგენი, პოზიტრონ-ემისიური ტომოგრაფია (PET) და კომპიუტერული ტომოგრაფია (CT) ვიზუალიზაციის ყველაზე ხშირად გამოყენებული კვლევებია. ასევე ტარდება ჰისტეროსკოპია (H/S; გამოიყენება საშვილოსნოს ღრუს დასათვალიერებლად, მხედველობის კონტროლით ბიოფსიის ასაღებად, შეხორცებებისა და ადჰეზიების მოსაშორებლად და სამკურნალოდ).

• საშვილოსნოს რენტგენოგრაფია (HSG): საშვილოსნოს ღრუს ვიზუალიზაციის კიდევ ერთი დიაგნოსტიკური მეთოდი. ეს არის რენტგენოლოგიური პროცედურა საშვილოსნოსა და ფალოპის მილების გამოსახულების მისაღებად. მისი მეშვეობით შეიძლება შემოწმდეს, აქვს თუ არა საშვილოსნოს ნორმალური ზომა და ფორმა.

• ბიოფსია: კიბოზე საეჭვო ქსოვილიდან მცირე ნაწილის აღება ლაბორატორიაში გამოსაკვლევად. ბიოფსია აუცილებელი პროცედურაა გინეკოლოგიური კიბოს დიაგნოზის დასადასტურებლად.

გინეკოლოგიური კიბოს მკურნალობა

მკურნალობის ვარიანტებს შორისაა ქირურგია, მედიკამენტური მკურნალობა, ქიმიოთერაპია და სხივური თერაპია. ჩვეულებრივ, შორსწასული შემთხვევებისთვის ქირურგია საუკეთესო ვარიანტია. საშვილოსნოს ყელის, საშვილოსნოსა და საკვერცხის კიბოს მქონე პაციენტებისთვის ჰისტერექტომია (საშვილოსნოს ამოკვეთა) მკურნალობის ძალიან გავრცელებული ვარიანტია. მკურნალობის არაქირურგიული ვარიანტებია:

• ქიმიოთერაპია: კიბოს შესანელებლად ან შესაჩერებლად გამოიყენება პრეპარატების სპეციალური კომბინაციები. ეს პრეპარატები ინტრავენურად შეჰყავთ ან შეიძლება პერორალურად, ტაბლეტების სახით იქნეს მიღებული.

• სხივური თერაპია: ეს არის მაღალი ენერგიის სხივების გამოყენება კიბოს უჯრედების გასანადგურებლად. თუ პაციენტის ოპერაცია შეუძლებელია, ექიმმა შეიძლება სხივური თერაპია ურჩიოს. სხივური თერაპიის ვარიანტი, რომელიც ეფექტურობის გამო გასათვალისწინებელია, არის „ბრაქითერაპია“. სიმსივნის სტადიის მიხედვით ბრაქითერაპია შეიძლება ორი ტექნიკით ჩატარდეს. ერთ-ერთი მათგანია საშოში რადიაციის წყაროს შემცველი მოწყობილობის მოთავსება. მეორე ტექნიკა, რომელიც უფრო დიდი სიმსივნეების დროს გამოიყენება, არის სიმსივნეში რამდენიმე ნემსის შეყვანა რადიაციის წყაროსთან ერთად. ერთ-ერთი კვლევის თანახმად, პაციენტები, რომელთა მკურნალობასაც ბრაქითერაპია დაემატა, უფრო დიდხანს ცოცხლობდნენ [16]. ბრაქითერაპიით ნამკურნალები საშვილოსნოს ყელის კიბოს მქონე პაციენტების შეფასებები მკურნალობის ეფექტურობასა და ხარისხს ადასტურებს [15].

ხშირად დასმული კითხვები:

სად იგრძნობა საშვილოსნოს ყელის კიბოს ტკივილი?

მენჯში, წელის ქვედა ნაწილსა და მუცლის ქვედა ნაწილში განვითარებული ტკივილი შეიძლება საშვილოსნოს ყელის კიბოს ნიშანი იყოს.

როგორ ტარდება გინეკოლოგიურ-ონკოლოგიური გასინჯვა?

გინეკოლოგიურ ონკოლოგიაში ხორციელდება ქალის რეპროდუქციული სისტემის დაავადებების დიაგნოსტიკა და მკურნალობა. დიაგნოზი გინეკოლოგიური გასინჯვით ისმება. ექიმი ჯერ ზოგადი გასინჯვისას სიმპტომების შესახებ გეკითხებათ. შემდეგ გთხოვთ, ზურგზე დაწვეთ და ატარებს გარეგან ვიზუალურ გასინჯვას. ვიზუალური გასინჯვით დგინდება, ხომ არ აღინიშნება საშოში სიწითლე, გაღიზიანება ან რაიმე არანორმალური მდგომარეობა. ოჯახში კიბოს ანამნეზისა და თქვენი სამედიცინო ისტორიის გათვალისწინებით ტარდება დიაგნოსტიკური ტესტები. ულტრაბგერით მოწმდება საშვილოსნოსა და საკვერცხეების ჯანმრთელობის მდგომარეობა. ტესტით, რომელსაც ნაცხის ტესტი ეწოდება, საშვილოსნოს ყელიდან უჯრედების ნიმუში აიღება. ამ გზით შესაძლებელია კიბოსწინარე დაზიანებების დიაგნოსტირება.

რომელი ექიმი მკურნალობს გინეკოლოგიურ ონკოლოგიას?

გინეკოლოგიურ ონკოლოგიას მკურნალობენ ექიმები, რომლებსაც „ონკოგინეკოლოგები“ ეწოდებათ და რომლებიც სპეციალურად არიან მომზადებული ქალის სასქესო ორგანოებში განვითარებული კიბოს დიაგნოსტიკისა და მკურნალობისთვის.

ჩანს თუ არა საშვილოსნოს კიბო ულტრაბგერაზე?

საშვილოსნოს კიბოს გამოვლენა ხშირად შესაძლებელია ისეთი ვიზუალიზაციის მეთოდებით, როგორიცაა ულტრაბგერა. ულტრაბგერაზე იგი წარმონაქმნის სახით ჩანს. თუმცა, ნანახი წარმონაქმნის დანამდვილებით კიბოდ მიჩნევა შეუძლებელია. კიბოზე საეჭვო წარმონაქმნების დიაგნოზის დასადასტურებლად საჭიროა ბიოფსია.

საშვილოსნოს კიბოს რამდენი სახეობა არსებობს?

საშვილოსნოს კიბოს ორი სახეობა არსებობს. პირველი ფართოდ გავრცელებული ენდომეტრიუმის კიბოა. ენდომეტრიუმის კიბო, რომელსაც საშვილოსნოს კედლის კიბოსაც უწოდებენ, გინეკოლოგიური კიბოს ყველაზე ხშირი სახეობაა. საშვილოსნოს კიბოს მეორე სახეობა უფრო იშვიათი საშვილოსნოს სარკომაა, რომელიც საშვილოსნოს კუნთოვან კედელში წარმოიქმნება.

ქალებში გავრცელებულ ამ კიბოებთან საბრძოლველად და თქვენი ჯანმრთელობის დასაცავად შეგიძლიათ რეგულარულად მიმართოთ გინეკოლოგიური ონკოლოგიის სპეციალისტს. ადრეული დიაგნოსტიკა მკურნალობის შანსების გაზრდისა და თქვენი ჯანმრთელობის დაცვის მნიშვნელოვანი ნაწილია.

თავიანთი დარგის გამოცდილი ექიმი-სპეციალისტები ტექნოლოგიის ყველა შესაძლებლობის გამოყენებით ემსახურებიან კიბოს ადრეულ დიაგნოსტიკასა და მკურნალობას. საშვილოსნოს ყელის კიბო ძუძუს კიბოს შემდეგ ქალთა სიკვდილიანობის მეორე ყველაზე ხშირი მიზეზია. ვინაიდან იგი ცნობილი აგენტით, ადამიანის პაპილომავირუსით (human papilloma virus: HPV), არის გამოწვეული და სქესობრივი გზით გადადის, საშვილოსნოს ყელის კიბო პრევენცირებადი დაავადებაა. მაღალი რისკის ადამიანის პაპილომავირუსები საშვილოსნოს ყელის კიბოს შემთხვევების 99%-ში დადებითი აღმოჩნდა. საშვილოსნოს ყელის ნაცხის ტესტის (პაპ-ნაცხი) წყალობით შესაძლებელია ადრეული დიაგნოსტიკა და გადარჩენის შანსი მნიშვნელოვნად უმჯობესდება. საშვილოსნოს ყელის კიბოსგან, რომლის 99%-ს ადამიანის პაპილომავირუსი (HPV) იწვევს, და მეჭეჭებისგან დასაცავად ვაქცინების გამოყენება დაიწყო. ოთხვალენტიანი ვაქცინა, რომელიც შემუშავებულია კიბოს 70%-ზე პასუხისმგებელი 16 და 18 ტიპებისა და მეჭეჭების 90%-ზე პასუხისმგებელი 6 და 11 ტიპების წინააღმდეგ, ჩვენს ქვეყანაშიც გამოიყენება. ჩვენს საავადმყოფოში HPV ვაქცინაცია ტარდება.

კოლპოსკოპია;

ეს არის მიკროსკოპი, რომელსაც საშვილოსნოს ყელის გამოსახულების 6-40-ჯერ გადიდება შეუძლია. ჩვენს საავადმყოფოში კოლპოსკოპიას ჩვენი გამოცდილი ექიმები საშვილოსნოს ყელის კიბოს დიაგნოსტიკაში სიღრმისეული კვლევის მეთოდად იყენებენ. გარდა ამისა, ადამიანის პაპილომავირუსის სკრინინგი სანდო მეთოდებით ტარდება. ამ სტანდარტული დიაგნოსტიკური მეთოდების გარდა, გინეკოლოგიური კიბოს დროს ისეთი მეთოდებით, როგორიცაა ტრანსვაგინალური ულტრაბგერა, დოპლერი და ჰისტეროსკოპია, კიდევ უფრო ადრეული დიაგნოსტიკისა და მკურნალობის შესაძლებლობები გთავაზობთ. ამრიგად, ჩვენი რეგულარულად გასინჯული პაციენტებისთვის საშვილოსნოს ყელის (ცერვიქსის), საშვილოსნოს შიგნითა გარსის (ენდომეტრიუმის), საკვერცხისა და ძუძუს კიბო შიშის საგანი აღარ არის. პაციენტების მართვა, რომელთა საშვილოსნოს ყელის ნაცხებში SIL, CIN ან ASCUS დიაგნოზი დაისვა, ასევე კოლპოსკოპიით ხორციელდება.

კიბოსთან დაკავშირებული გინეკოლოგიური გასინჯვის გარდა ჩვენს განყოფილებაში ჩატარებული პროცედურები

ძუძუს კიბო

• მამოგრაფია

• ძუძუს MR

• ძუძუს ულტრასონოგრაფია

საშვილოსნოს ყელის კიბოს სკრინინგი

• ნაცხი

• კოლპოსკოპია

• ბიოფსია კოლპოსკოპიის კონტროლით

საკვერცხის კიბოს სკრინინგი და დიაგნოსტიკა

• დოპლეროგრაფია,

• სიმსივნური მარკერები (CA 125, CA 153, CA 199, CEA, ალფა FP, ბეტა hCG და სხვა სიმსივნური მარკერები)

საშვილოსნოს კიბოს სკრინინგი და დიაგნოსტიკა

• საშვილოსნოს შიგნიდან ქსოვილის აღება (ენდომეტრიუმის ბიოფსია)

• საშვილოსნოს შიგნითა გარსის სისქის გაზომვა

• დოპლეროგრაფია

ჩვენს კლინიკაში ტარდება ყველა გინეკოლოგიური კიბოს ოპერაცია. გარდა ამისა, არასრულად ჩატარებული ოპერაციის მქონე პაციენტებს უტარდებათ დამასრულებელი ქირურგიული ჩარევა.