ენდოსკოპიის ლაბორატორია

ენდოსკოპია არის საყლაპავის, კუჭის, ნაღვლოვანი გზებისა და ნაწლავების გამოკვლევის პროცედურა, რომელიც სრულდება მოქნილი (მოსახვევი) ინსტრუმენტით, რომლის წვერზე განთავსებულია განათებისა და მიკროკამერის სისტემა.

ენდოსკოპიის ერთეულში:

• გასტროდუოდენოსკოპი

• კოლონოსკოპი

• დუოდენოსკოპი (ERCP)-ის ვიდეოენდოსკოპიური მოდელებით მომსახურება ხორციელდება; შესაძლებელია გამოსახულებისა და CD-ჩანაწერის შექმნა.

ენდოსკოპიის ერთეული გამოიყენება არა მხოლოდ დიაგნოსტიკური, არამედ სამკურნალო მიზნითაც. ენდოსკოპისა და სხვა გამოყენებული ინსტრუმენტების გაწმენდა, დეზინფექცია და სტერილიზაცია ძალიან მნიშვნელოვანია. ჩვენს ერთეულში პროცედურები სრულდება ავტომატური სარეცხი და სტერილიზაციის აპარატებით. პროცედურების ანგარიშის შედგენა, გამოსახულებების აღება და საჭიროების შემთხვევაში CD-ზე ჩაწერა, არქივირება შესაძლებელია და მისი ერთი ეგზემპლარი პაციენტს გადაეცემა. ენდოსკოპიური გამოკვლევების დროს გართულებები მაქსიმალურად მინიმუმამდეა დაყვანილი, თუმცა განყოფილებაში შესაძლო ნებისმიერი გართულებისა და რეაქციისთვის სწრაფი რეაგირებისთვის არსებობს CRACH CAR (გადაუდებელი ჩარევის ყველა სახის წამლისა და მასალის ეტლი). იგი აღჭურვილია ჟანგბადით, ვაკუუმით, მონიტორით, დეფიბრილატორით, ინტუბაციის საშუალებებით. ენდოსკოპიური გამოკვლევების, შესაძლოა, ყველაზე მნიშვნელოვანი უპირატესობა ადრეული კიბოს დიაგნოსტიკაშია. მონელების სისტემის გვიან დადგენილი კიბოების მკურნალობის სიძნელეები და ზოგ ტიპში მკურნალობის შეუძლებლობა დღემდე დიდ პრობლემად რჩება. კიბოს ზრდამდე და გავრცელებამდე დადგენა მკურნალობის თვალსაზრისითაც ნუგეშისმცემელია. იაპონიაში კუჭის კიბო, ხოლო ამერიკაში მსხვილი ნაწლავის კიბო, ჩვენს ქვეყანასთან შედარებით გაცილებით ხშირად გვხვდება, თუმცა ამ დაავადებებით გამოწვეული სიკვდილის შემთხვევების პროცენტი ჩვენზე უფრო დაბალია. ამის მიზეზი იაპონიასა და ამერიკაში ენდოსკოპიური პერიოდული სკრინინგის ჩატარებაა. ადრეულ ეტაპზე დადგენილი კუჭისა და მსხვილი ნაწლავის კიბოს მკურნალობა, როგორც წესი, შესაძლებელია. მონელების სისტემის დაავადებების დიაგნოსტიკაში ენდოსკოპიის გარდა დიდ წვლილს შეაქვს გამოსახულებითი მეთოდებიც და ბიოქიმიური გამოკვლევებიც. ხშირად გამოიყენება ისეთი გამოსახულებითი ტექნიკები, როგორებიცაა ულტრაბგერა, ტომოგრაფია, მაგნიტურ-რეზონანსული გამოკვლევა. ჩვენი საავადმყოფოს რადიოლოგიის ერთეული რთული შემთხვევების დიაგნოსტიკაში ეხმარება ჩვენს განყოფილებას, ასევე უზრუნველყოფს ისეთი ორგანოებიდან, როგორებიცაა ღვიძლი და პანკრეასი, ვიზუალური კონტროლით ბიოფსიის აღებას (ინვაზიური რადიოლოგია) და საბოლოო დიაგნოზის დასმის შესაძლებლობას. ბიოქიმიური გამოკვლევები, რუტინულ გამოკვლევებთან ერთად, ჰორმონული და კიბოს მარკერების კვლევებით, ხელს უწყობს ჩვენი გასტროენტეროლოგიის ერთეულის მუშაობას.

დიაგნოსტიკური ენდოსკოპია

• ეზოფაგოგასტროდუოდენოსკოპია: გამოიყენება საყლაპავის, კუჭისა და თორმეტგოჯა ნაწლავის გამოსაკვლევად.

• კოლონოსკოპია: გამოიყენება ანუსის არხის, სწორი ნაწლავისა და მსხვილი ნაწლავის გამოსაკვლევად.

• ენდოსკოპიური რეტროგრადული ქოლანგიოპანკრეატოგრაფია (ERCP): გამოიყენება ნაღვლის გზების გამოსაკვლევად.

სამკურნალო (თერაპიული) ენდოსკოპია

• პოლიპექტომია: მსხვილი ნაწლავისა და კუჭის პოლიპების ენდოსკოპიური მეთოდით, ქირურგიული ოპერაციის გარეშე მოცილება.

• სკლეროთერაპია: ვარიკოზული სისხლდენებისა და წყლულოვანი სისხლდენების ენდოსკოპიური მეთოდით, ინექციით შეჩერება.

• ბანტლიგაცია: საყლაპავის ვარიკოზისა და ჰემოროიდების ენდოსკოპიური მეთოდით, ელასტიკური ბანდით შებმით მკურნალობა.

• დილატაცია და სტენტის დადგმა: მონელების სისტემაში სხვადასხვა მიზეზით წარმოქმნილი ვიწროებების ენდოსკოპის საშუალებით, ბუჟით ან ბალონით გაფართოება და ვიწროებებზე შესაბამისი სტენტების განთავსება.

• პერკუტანური ენდოსკოპიური გასტროსტომია (PEG): საყლაპავის ვიწროებების ან პერორალურად ვერ მკვებავი პაციენტებისთვის, ხანგრძლივად კვების გზის შესაქმნელად, ენდოსკოპიური მეთოდით კუჭში ხვრელის გაკეთება და პაციენტის კვება ამ გზით.

• უცხო სხეულის ამოღება: შემთხვევით ჩაყლაპული ნემსის, მონეტისა და სხვ. ენდოსკოპის საშუალებით ამოღება.

• ენდოსკოპიური რეტროგრადული ქოლანგიოპანკრეატოგრაფია (ERCP): ნაღვლის ქვების ქირურგიული ჩარევის გარეშე ამოღება, ნაღვლის გზების ვიწროებების აღმოფხვრა და სტენტის დადგმა.