რადიაციული ონკოლოგია

რა არის სხივური თერაპია?

რადიოთერაპია არის მკურნალობის მეთოდი, რომელიც სპეციალური აპარატების საშუალებით, მაღალენერგიული მაიონებელი გამოსხივებით მიზანმიმართულად მოქმედებს ავთვისებიან და ზოგიერთ კეთილთვისებიან სიმსივნეზე. კლინიკებს, სადაც ეს მკურნალობა სათანადო პრინციპების დაცვით ტარდება, „რადიაციული ონკოლოგიის კლინიკა“ ეწოდება.

კიბოთი დაავადებული ყველა პაციენტის 70–80%-ს დიაგნოზის დასმის შემდეგ, ცხოვრების რომელიმე ეტაპზე, რადიოთერაპია სჭირდება. კიბოს მკურნალობაში რადიოთერაპია შეიძლება გამოყენებულ იქნას დამოუკიდებლად, როგორც ძირითადი მკურნალობა (რადიკალური), მკურნალობის ეფექტიანობის გასაზრდელად ქირურგიული ჩარევის ან ქიმიოთერაპიის წინ ან შემდეგ (ადიუვანტური/ნეოადიუვანტური), ან ქიმიოთერაპიასთან, იმუნოთერაპიასთან ან მიზნობრივ თერაპიასთან ერთდროულად (კონკურენტული). გარდა ამისა, ის ერთ-ერთი ყველაზე ეფექტიანი და ხშირად გამოყენებადი მეთოდია კიბოთი გამოწვეული ისეთი ჩივილების სამკურნალოდ, როგორიცაა ტკივილი, სისხლდენა და გაუვალობა — ჩივილების აღმოფხვრისა და პაციენტის ცხოვრების ხარისხის გაუმჯობესების მიზნით (პალიატიური).

დაავადებები, რომელთა დროსაც გამოიყენება რადიოთერაპია:

• ფილტვის კიბო

• თავისა და კისრის კიბო (ცხვირ-ხახა, პირ-ხახა, ხორხ-ხახა, ხორხი, ცხვირის ღრუ და დანამატი წიაღები, პირის ღრუ, სანერწყვე ჯირკვალი)

• ზოგიერთი კეთილთვისებიანი დაავადება (AVM, კელოიდი და სხვ.)

• კანის კიბო (ბრტყელუჯრედოვანი და ბაზალურუჯრედოვანი კიბო, მერკელის უჯრედოვანი კარცინომა, მელანომა)

• ენდოკრინული სიმსივნეები (ფარისებრი ჯირკვალი, თირკმელზედა ჯირკვალი, ჰიპოფიზი)

• კუჭ-ნაწლავის ტრაქტის კიბო (საყლაპავი მილი, კუჭი, პანკრეასი, ღვიძლი და სანაღვლე გზები, მსხვილი ნაწლავი, სწორი ნაწლავი, ანალური არხი)

• შარდსასქესო სისტემის კიბო (წინამდებარე ჯირკვალი, შარდის ბუშტი, თირკმელი, პენისი, სათესლე ჯირკვალი, შარდსაწვეთი)

• გინეკოლოგიური კიბო (საშვილოსნოს ყელი, ენდომეტრიუმი, საკვერცხე, საშო, ვულვა)

• ძვლისა და რბილი ქსოვილების კიბო

• ლიმფომა, ლეიკემია, მიელომა

• სარძევე ჯირკვლის კიბო

• ცენტრალური ნერვული სისტემის სიმსივნეები (თავის ტვინი, ზურგის ტვინი)